طارق الشيخ: مقدرش أشيل وزر حرف غلط لو سجلت القرآن بصوتي| فيديو - بوراق نيوز

الجمعة 28/يونيو/2024 - 11:39 م

تحدث المطرب طارق الشيخ، عن إمكانية تسجيل القرآن الكريم بصوته كصدقة جارية، بعدما طرح أدعية خلال شهر رمضان، ولاقت استحسان جمهوره بالوطن العربي.

وقال طارق الشيخ، خلال لقائه مع القاهرة 24: أنا أقول أدعية أو تواشيح، وإنما القرآن له مخارج حروف معينة، لو غلطت في نطق حرف بيغير المعنى، فأنا مقدرش أشيل الوزِر ده.

طارق الشيخ: أنا قاصد أبعد حياتي الشخصية عن الأضواء

وعن إبعاد أسرته وحياته الشخصية عن الإعلام والأضواء، علق طارق الشيخ: للأسف لما بنيجي في برامج بيتكلموا ويتدخلوا في الحياة الشخصية، أنا راجل فنان كلمني عن فني بس ومتكلمنيش عن أي حاجة تانية، وأنا قاصد أبعد حياتي الشخصية عن الأضواء، وأنت جايبني علشان أنا طارق الشيخ المطرب، إذًا كلمني عن طارق الشيخ المطرب.

طارق الشيخ: المهرجانات متتساواش بالأغنية الشعبية

كما علق المطرب طارق الشيخ، على خلط الجمهور بين الأغنية الشعبية والمهرجانات، قائلًا: الخلط بين الأغنية الشعبية والمهرجان شيء سيئ، ومش هيتساوى ده بده، لأن الأغنية الشعبية لحد دلوقتي بتتسمع في البيوت، وبتوع المهرجانات كل يوم بينزلوا أغاني علشان هما كتير ومفيش حد بابا المجال، لكن أنا أحب اللي يغني كويس ويغني كلمة كويسة، والمهرجانات ظاهرة وهتروح لحالها، وكل واحد بيسجل 5 أغاني وبينزل أغنية كل أسبوع وده مكانش موجود.